Langile bat hil da gaur gauean Laudion, Vibrantz fabrikan gertatutako lan-istripu batean. Gaueko hamabiak pasata, labe bat lehertu da pigmentuak fabrikatzen dituen lantegi horretan eta behargin bat hil da horren ondorioz.
Langile Batzordeko kideek azaldu dute labearen matxura bat konpontzera bertaratu zela lankidea, mantenuko atalean aritzen baitzen. Zehazki, CCOOk aipatu du enpresak topatu duela anomalia bat labean eta behargina bidali duela hara. Atzeko partean azpiegitura berrikusten ari zen labeak eztanda egin duenean. Laudiokoa zen behargina eta 49 urte zituen.
Suhiltzaileak eta Osalaneko teknikariak bertaratu dira Gasteiz kaleko fabrikara gauerdian. Dirudienez, prebentzio delegatuei azaldu diete ohiko prozedura batean gertatu dela eztanda eta ikertu behar dutela.
Iturri sindikalek aipatu diote Aiaraldea Komunikabideari lantegiak ekoizpena gelditu duela bi egunez.
Langile Batzordeak mobilizazioa egingo du bihar 11:30etatik 12:30era bitarte, ordubetez, lantegiaren aurrean. Arratsaldean, aldiz, eskualdeko mobilizazioa egingo da 19:30ean Laudioko Herriko plazan, enpresa batzordeak zein SOS Aiaraldeak deituta.
Langile Batzordeak mobilizazioa egingo du bihar 11:30etatik 12:30era bitarte, ordubetez, lantegiaren aurrean. Arratsaldean, aldiz, eskualdeko mobilizazioa egingo da 19:30ean Laudioko Herriko plazan.
Agurra
Hildako langilea agurtzeko beila egingo dute bihar Larraz Ehorztetxean 17:00etatik 19:00ak arte.
LABen salaketa
LAB sindikatuak oharra zabaldu du nabarmentzeko urtero Euskal Herrian larritasun ezberdineko 100.000 lan-istripu inguru aitortzen direla ofizialki.
"Datuak gordinak bezain latzak dira: prebentzioaren integrazioa ez da gauzatzen, eta enpresek inpunitate osoz jokatzen jarraitzen dute, instituzioen konplizitatearekin. Osalanek enpresetan presentzia izan beharrean, komunikabideetan iragarritako ekintzekin justifikatzen du bere jarduna, milaka euro publiko xahutuz", adierazi du erakundeak.
LABek EAEko zein Nafarroako gobernuei eskatu die enpresetan indarrean dagoen araudia betearaz dezatela, "marketin-kanpainak alde batera utzita".
UGTren exijentzia
UGT sindikatuak ere argi utzi du bere jarrera gaur jazotako heriotzaren inguruan eta aurreratu du adi egongo dela Osalanek eta Lan Ikuskaritzak istripuaren ardurak argitu ditzaten. Bereziki, langile erakundeak uste du jakin behar dela ea segurtasun neurri guztiak betetzen ziren makinan.
Halaber, UGTk gaineratu du makinen mantenua bermatu behar dituztela enpresek, eta ez soilik lan puntualak egin: "Prebentzio mantenua egin beharra dago eta ez konponketa mantenua".
CCOO sindikatuak ere bat egin du biharko protestarekin eta elkartasuna adierazi die beharginaren gertukoei. Bide batez, Osalani eta Lan Ikuskaritzari azpimarratu die beharrezkoa dela heriotzaren arrazoia argitzea.
33 kasu Euskal Herrian
Azken heriotza honekin 33 dira Euskal Herrian 2026an lanean, lanera bidean edo bueltan hildako herritarrak, LAB sindikatuaren arabera.
Aiaraldean, azken hamarkadan, 18 beharginek baino gehiagok galdu dute bizia lanpostuan zirela; azkena duela urtebete, Amurrioko Tubos Reunidos lantegian, altuera batetik erorita.
Laudioko Udalaren oharra
Gertakariaren garrantzia dela eta, Laudioko Udalaren Bozeramaleen Batzordeak aho batez erabaki du Laudion izandako lan-istripua salatzea, eta istripua eragin zuten inguruabarrak zein ondoriozko erantzukizunak argitzeko eskatzea.
Halaber, Udalak doluminak eman nahi dizkie hildako langilearen familiari, lagunei nahiz lankideei.
Era berean, tokiko erakundeak bat egiten du istripu hau salatzeko eta biktimaren inguruko pertsonei elkartasuna eta babesa adierazteko ekimenekin, eta herritarrak ere ekimen horiekin bat egitera animatu ditu.